مساؤكم بخير. ليوم مع وصفة مقرود المقلة لي هر سلطان سينية العيد الكبير. عندنا 3 كيلات دقيق الفرخ( دقيق الفرخ هو دقيق مصير تنحيلو الدقاق و الحبة الخشينة، يعني يبقى دقيق رطب باه يعطيكم نتيجة مليح، انا هنا خدمت بدقيق كنزة و فرينة ماما ). كيلة فرينة، كيلة بسوس. نبسس مليح من بعد نبل بخليط بماء زهر و الماء بلا ما ننساو الملح. ماتكونش عجينة يابسة تكون مليحة على خاطر من بعد يشربنا الدقيق. السر الاول انا مانعجنوش، و تاني مع نبل ماتخليهش يرتح ( يرتح بعد ما نطبعو) ، الغرس يكون مداوي كيما قتلكم لبارح ، بصح الغرس هنا ماديروهش طالق روحو باه ما تتنفخش حبة المقرود فالمقلة. العجينة نحلها رقيقة و نحط الغرس تاعي يكون رقيق، نقفل مليح باه بتنحى الهوى و ندورها 3 مرات. مقرود المقلة يكون رقيق خاطي كي مقرود الكوشة، نطبع و ننقب المقرودة نخليه يرتح باه تجي نتيجة مليحة. انا على الجوانب ندهن ببياض البيض باه ماتحرقليش الغرس و نقليه حتى ياخد اللون الذهبي. مقرود المقلة يجيكم بنين كي ديروه بغرس البطانة . بالصحة و الهنا و ربي يرفع علينا الوباء. تحياتي لكم...